Kinumpirmatar ti maysa nga auditor ti Commission on Audit (COA) a ni Vice President Sara Duterte laeng ti kakaisuna a bise presidente ken nagbalin a Secretary ti Department of Education (DepEd) a naaddaan iti confidential funds.
Daytoy ti imbinglay ni Intelligence and Confidential Funds Audit Office (ICFAO) Auditor Roderick Wamil a nagtestigo iti impeachment trial ti bise presidente idi Lunes, Agosto 04, 2026.
Sigun kenni Auditor Wamil, idi panawen laeng ni Duterte nangisayangkat daytoy iti audit seknan iti confidential funds para iti Office of the Vice President (OVP) ken Department of Education (DepEd).
Inlawlawag ni Wamil nga iti panagtrabahona iti ICFAO manipud 2014 agingga 2024, awan ti nailatang a confidential funds para kenni sigud a Vice President Jejomar Binay, a nagserbi manipud 2010 agingga 2016, kasta met kenni sigud a Vice President Leni Robredo, a nagserbi met manipud 2016 agingga 2022.
“Since nag-assume po ako noong 2014 sa ICFAO, wala pong naging appropriation for confidential fund si dating Vice President Binay at si dating Vice President Robredo,” ani Wamil. “Tanging si Vice President Sara Duterte lang po ang nagkaroon ng appropriation for confidential funds.” sigun kenni Wamil
Innayon ni Wamil a ni Duterte ti kakaisuna a DepEd Secretary a naaddaan ti confidential funds.
Sigun kenkuana, sinukimatna ti panagaramat ti Department of Education (DepEd) kadagiti confidential funds, partikular ti cash advances nga agdagup iti P112.5 million a mangsaklaw iti umuna agingga iti maikatlo a kuarter ti 2023, wenno P37.5 milion iti tunggal kuarter.
