BAGUIO CITY – Dumandanon iti sangapulo ket lima nga oras ti biyahe dagiti bus manipud Metro Manila paturong iti siyudad ti Baguio.
Daytoy ket sigun iti panakiuman ti Bombo Radyo Baguio kadagiti sumagmamano a pasahero ken bus driver a nagtaud sadiay Cubao, Quezon City.
Daytoy ket gapu iti nailet a gunay ti trapiko ken mapaspasaran a panagpayus iti paset ti North Luzon Express Way (NLEX) partikular sadiay San Simon, Pampanga.
Sigun iti maysa a pasahero, nagrubbuat ti nagluganan dagitoy a bus 1:16 AM itay parbangon (Sept. 1, 2026) ngem nakadanon dagitoy ditoy siyudad ti Baguio itay 4PM.
Kinunana a gapu ta sarado ti NLEX ken bailet a gunay ti trapiko, nagrikus ti naglugananda a bus sadiay Nueva Ecija.
Maipalagip a ti kadawyan a travel time manipud Metro Manila agingga iti siyudad ti Baguio ket uppat agingga iti lima nga oras.//via Bombo Alfred Pudsoc
