Kinarit wenno chinallenge ni Mayor Alfredo Dacumos, Jr. dagiti residente t i Munisipyo ti Sablan nga agmula iti prutas kagidan iti selebrasyon ti maika-12 Fruit Festival ita nga aldaw.
Iti mensahe ni Mayor Dacumos, Jr., babaen iti daytoy ket mamintinir ti Fruit Basket a titulot ti nasao a munisipyo iti Probinsya ti Benguet.
Innayon pay daytoy a masarakan iti munisipyo dagiti nagduduma a prutas a masarakan metlaeng iti sabali a lugar kas iti durian, mangosteen, ken dadduma pay a prutas.
Impeksa pay daytoy a nupay adda dagiti karit a mapaspasaran kas iti agdama a weather condition, awan ti manglapped tapno malabananda amin daytoy.
Kabayatanna, iti mensahe ni Governor Melchor Diclas babaen iti nangirepresentar kenkuana, kinaritna metlaeng ti nasao a munisipyo nga adda metlaengen ti mangirugi ti farm tourism.
Ti nasao nga aktibidad ket opisyal a nailukat babaen iti coffee-choco toast nga indauloan ni Mayor Dacumos Jr. ken pinasetan met dagiti opisyales ken residente.
Adda met dagiti international visitors dagitoy manipud Guam ken South Korea.
Dimmar-ay met ni Vice Governor Mary Rose Fongwan-Kepes kasta metlaeng ni Tuba Mayor Clarita Salongan ken dadduma pay a government -line agencies ken officials.
Nagserbi met kas keynote speaker ni Daisy Payang, Provincial Director ti Department of Interior and Local Government (DILG) ti Benguet.
Ti maika-12 Sablan Fruit ket addaan iti tema a “” A Dozen Years of Abundance: Rooted in Tradition, Harvesting hope, Fruiting prosperity.”
Agpaut met ti selebrasyon agingga inton Setiembre 4.
Maaddaan iti fruit-based innovation, agri quiz bee, amazing race, ken vloggers challenge inton bigat, Setiembre 3 bayat nga inton Setiembre 4 met ti pakaangayan ti Closing Program ken dadduma nga aktibidad kas iti song writing competition, Best Fruit Farmer, Recruitment for Army and Navy, Line Dance, ken Cultural Night Program.
Iti sabali a bangir, kagidan ti programa ita nga aldaw, naipatungpal metlaeng ti blood donation ken nangidiaya metlaeng ti libre a puis ti Sablan Municipal Police Station (Sablan MPS).
Tampok metlaeng ti programa ita nga aldaw dagiti 8 a floats manipud iti nagduduma a babbarangay iti nasao a munisipyo. // via Bombo Noveh Organo
