Saan a natuloy ti naituding nga arraignment ni VP Sara Duterte ita nga aldaw idiay Quezon City.
Nasapa met a nagtitipon itay agsapa dagiti tagasuporta ni VP Sara iti ruwar ti Quezon City Hall para iti nasao nga arraignment gapu iti kaso a grave threat wenno ti panagpangta na kontra iti biyag da President Ferdinand ‘Bongbong’ Marcos Jr, First Lady Liza Araneta-Marcos, ken sigud a House Speaker Martin Romualdez.
Kadua met ti bise presidente a nagturong sadiay ti kabsat na a ni Davao City 1st District Representative Paolo “Pulong” Duterte.
Naitantan ti nasao nga arraignment kalpasan a nangipila ti kampo ni VP Sara iti petisyon iti Temporary Restraining Order (TRO) iti Korte Suprema tapno lapdan ti panagdengngeg ti kaso daytoy.
Simmango met daytoy kadagiti supporters na iti ruwar ti korte kalpasan a naideklara a saan a matuloy ti naituding a pannakaibasa ti kaso kontra kenkuana.
