Inpakaammo ni US President Donald Trump nga immanamong ti Russia ken Ukraine iti dagus a panagsardeng ti panangrautda kadagiti tunggal pasilidad ti enerhiya dagitoy.
Nupay kasta, kinuna ni Ukrainian President Volodymyr Zelenskiy nga immuna a naammuanna ti maipapan iti katulagan babaen iti social media post ni Trump.
Impaganetget ni Zelenskyy a nakasagana ti Ukraine a mangpasardeng kadagiti panagraut kadagiti refinery ti Russia no isardeng met ti Moscow ti panagrautna kadagiti power infrastructure ti Ukraine.
Kabayatanna, kinuna ni Zelenskyy a nakasagana a mangisayangkat iti eleksion sadiay Ukraine no umanamong ni Russian President Vladimir Putin iti 60 nga aldaw a ceasefire.
Iti sidong ti linteg ti Ukraine, saan a maisayangkat ti eleksion bayat nga epektibo ti linteg militar gapu kadagiti pakaseknan iti seguridad.
Pinakdaaran ni Trump ni Zelensky nga isardengna ti panangraut kadagiti refinery ti Russia ken indagadagna kadagiti Ukrainian nga agpili dagitoy iti baro a lider a makikapya iti Moscow.
Inlaksid ni Zelenskyy ti pammabasol ni Trump a ti giera iti nagbaetan ti Ukraine ken Russia ti rason iti panagngato ti presio ti diesel.
Sigun kenkuana, dakkel ti epekto ditoy ti giera sadiay Middle East.
