Sinuportaran ti Armed Forces of the Philippines (AFP) ti desision ni Defense Secretary Gilbert Teodoro Jr. a suspinderenda ti direkta a komunikasion militar iti China.
Sigun kenni AFP spokesperson for the West Philippine Sea retired rear admiral Roy Vincent Trinidad, kasapulan ti panagtalek ken panagraem iti international law tapno agbalin nga epektibo ti komunikasion.
Innayonna nga ar-aramaten laeng daytoy ti China tapno makaleban ti ilegal ken agresibo nga aramid daytoy.
Mainaig iti dayta, impasigurado ti AFP nga agtultuloy ti maritime patrols ken rotation and resupply missions dagitoy, agraman ti pannakaitulod dagiti suplay iti BRP Sierra Madre iti Ayungin Shoal.
Kabayatanna, inlawlawag ti Malacañang a saan a karaman iti nasao nga addang ti pannakaputed ti diplomatic ken trade relations ti Pilipinas ken China.
Agtultuloy latta ti pannakilangen ti gobierno kadagiti dadduma bayat ti panangidepensana iti kinasoberano ken nasional nga interes ti pagilian iti West Philippine Sea.
