Agbalin kas paset iti pannakaamyendar ti Anti-Bullying Ordinance iti siudad ti Baguio ti panagatendar dagiti parentes dagiti nairaman iti bullying incidents.
Sigun kenni Councilor Edison Bilog, impeksana nga iti agdama nga ordinansa, saan ngamin a required ti pannakipaset dagiti parentes kadagiti annakda nga involved iti bullying isu’t gapunna a saan met dagitoy a maki-at-atendar.
Malaksid ti dayta ket saan a nailanad ti mabalin a consequences nu saanda a sumango wenno ag-atendar ti meeting.
Iti baet dayta, impeksa daytoy nga apaman a maaprobaran ti pannakaamyendar ti nasao a linteg, makiddawen kadagiti parentes ti pannakipaset da iti nasao nga issue.
Malaksid iti dayta, impeksa ti opisyal a kasapulan a papigsaen ti partisipasyon ti komunidad nangnangruna iti barangay maipapan iti nasao nga issue.
Innayon ti opisyal a ti bullying ket maysa a concerned effort iti komunidad ken barangay, saan laeng a ti Department of Education (DepEd) ken City Government iti Baguio.
Mainaig iti dayta, impeksa ni Bilog a puntiryada iti umuna a paset iti 2027 ket mangrugi metten a maiyemplementar ti maamyendaran a linteg.
Kabayatanna, naaddaan iti diversion conference idiay Justice Hall maipanggep iti maysa a kaso ti bullying a naipila iti korte.
Sigun kenni Councilor Edison Bilog, daytoy ti kaunaan nga ada ti mapilaan a kaso gapu iti bullying.
Inlawlawagna a saan man a naihabol para iti kaso a panaglabsing iti Anti-Bullying Ordinance, napilaan met ti akusado nga agtawen iti 15 iti maltreatment ken manamnama pay a mapasarunoan ti civil case kontra kadagiti parentes daytoy.
Ti nasao nga insidente iti bullying ket napasamak metlaeng iti maysa a pagadalan iti siudad ti Baguio.
Mainaig iti dayta, maysa kadagiti makitkita a rason nu apay nga adda latta ti bullying ket gapu ta masetsettle daytoy a dagos.
Sigun kenni Councilor Bilog, iti gundaway a masettle a dagos dagiti kaso, saan a maipakita kadagiti ubbing wenno parientes ti consequence wenno dusa iti inaramidda.
Mangnamnama met daytoy a babaen iti pannakaamyendar ti linteg ken ti pannakaipila ti kaso iti korte ket agserbi kas adal ken mangipakita a seryoso ti kampania ti siudad kontra iti bullying. // via Bombo Vy Organo
