Imbinglay ni PLTCOL. Genevieve Revocal, pannakangiwat ti PNP Police Regional Office-Cordillera Administratice Region (PRO-CAR) a maiwaras ti agarup 3,300 a kameng ti nasao nga ahensya iti entiro a rehiyon Cordillera para iti umadani a pannakaobserbar ti Undas 2026.
Kagidan dayta, inlawlawagna ti agbalin a Security Plan ti Police Regional Office- Cordillera para iti nasao nga aldaw.
Iti pannakiuman ti Bombo Radyo, imbinglayna nga iti sidung ti Security Plan ti nasao nga ahensya, nabilin amin nga unit ti kapulisan iti Rehiyon Cordillera nga ipatungpalda amin nga addang iti panangsigurado iti kinatalged ken kinaurnos iti panangobserbar iti Undas ita a tawen.
Innayonna a ti basaran ti nasao a plano ket ti PNO Quad Approach. Karamanen ditoy ti Intelligence wenno ti umno a panangberipikar iti impormasyon kas kadagiti pangta ken mapagduaduaan nga aktibidas nga agbalin a basaran iti deployment dagiti kapulisan.
Maikadua ti Operations Approach wenno ti strikto a panangideploy kadagiti sementeryo, memorial park, columbarium, parke, malls kasta metten kadagiti terminals tapno malapdan ti anyaman a krimen ken dagos a panagresponde iti kanito nga adda ti mapasamak nga emerhensya ken pasamak.
Kabayatanna, impakaamo ni PLTCOL Revocal nga iti agdama, dumanon iti 190 ti bilang dagiti sementeryo iti entiro a Rehiyon Cordillera pakairamanan ti uppat a memorial parks ken maysa a columbarium.
Sigun kenkuana, tapno masigurado ti kinatalged kadagiti nadakamat a lugar, mangipatakder ti pulisya iti 148 a police assistance desk ken mangideployda iti 1,223 a police personnel nga agbantay kadagiti sementeryo.
Malaksid iti dayta, maideploy metlaeng ti PRO-COR iti 269 personnel kadagiti simbaan, 171 kadagiti kangrunaan a kalsada, 68 kadagiti transport hubs wenno kadagiti terminals, 280 kadagiti parke, ken 332 ti nadutokan a mangipatungpal iti mobile patrols, ken 971 kadagiti checkpoints.
Iti pakabuklan, 3,312 a kameng ti PNO PRO-CAR ti naituding a maideploy iti entiro a rehiyon kas panangsuporta iti pangpatalged iti publiko kabayatan iti undas.
Imbinglay ni PLTCOL Revocal a maiyemplementar ti heightened alert status iti entiro a rehiyon inton October 31 agingga Nobyembre 2, 2026.
Naituding met a mangituding ti nasao nga ahensya iti red teaming operation a pasetan ni Police Brigadier General Noel B. Vallo, Regional Director ti PNP PRO-CAR kadua dagiti command group ken staff ti nasao nga ahensya. //kcs//
