Agpalpallagip ti PNP Police Regional Office- Cordillera iti publiko mainaig iti umadani a pannakaobserbar iti Undas ita a tawen.
Iti pannakiuman ti Bombo Radyo, nagbalakad ni PLTCOL. Genevieve Revocal, pannakangiwat ti PNP PRO-CAR iti publiko nga agbalinda a naridam nangnangruna nu agbyahe dagitoy paturong kadagiti probisyada para iti undas.
Malaksid iti dayta, nagpallagip daytoy iti panangisecure kadagiti babbalayda ken siguradoen a nakakandado amin a tawa ken ruangan sakbay dagitoy a pumanaw kadagiti pagtaenganda.
Impallagipna metlaeng a bantayan a nalaing nu adda dagiti ubbing a kadua nga agturong iti sementeryo.
Nagballakad pay daytoy a nu saan a kasapulan nga agturong dagiti Persons with Disabilities (PWDs) kadagiti sementeryo, nasaysayaat nga agtalinaed da pay laeng kadagiti pagtaengan nu mabalin tapno maliklikan ti anyaman a saan a nasayaat a pasamak. //kcs//
