Nagdudupadop dagiti lokal a residente ken turista iti Strawberry Farm sadiay La Trinidad, Benguet ita a Domingo, Nobiembre 01.
Adu a bisita manipud iti nagduduma a lugar ti nagturong iti maysa kadagiti nalatak a tourist destinations iti probinsiya ti Benguet, partikular iti strawberry farm.
Sigun kadagiti sumagmamano a bisita, saan laeng a panaggatang ti rason ti panagbisitada, no di ket kayatda metlaeng a mapadasan ti nalatak a strawberry farm a masansan a makitkita dagitoy kadagiti ladawan ken social media.
Ti panagadu dagiti bisita ket maysa met a makatulong iti lokal a turismo ken pagbiagan dagiti aglaklako iti nasao a lugar.
Babaen iti panagbisita dagiti turista, maiparangarang met kadagiti umili manipud kadagiti sabali a rehion ken pagilian dagiti lokal a produkto ken kultura ti La Trinidad.
Namnamaen met dagiti agilaklako sadiay nga umadu pay dagiti turista nga agbisita iti nasao a lugar.
Nupay kasta, napateg latta a mataginayon ti kinadalus ken kiaurnos ti lugar tapno komportable ken natalged dagiti agpasyar.
Napalagipan metlaeng dagiti bisita a rumbeng nga itultuloyda ti disiplina babaen iti saan a panangibati kadagiti basura ken panangpatalinaed iti kinapintas ti pagpasyaran.
Kabayatanna, agtultuloy ti panagbantay ken panagronda dagiti otoridad tapnu mapagtalinaed iti seguridad ken kinatalged dagiti turista nga agturong iti nasao a lugar. //Bombo Khey Reparip
