Naduktalan iti maysa a lalaki, agatawen iti 35 years old, reservist ken residente iti Camp Allen, Baguio City, ti maysa nga Unexploded Ordinance (UXO) wenno bomba.
Maibasar iti imbestigasyon ti pulisya, nasarakan daytoy ti nasao a residente bayat iti panagdalusna iti aglawlaw iti pagtaenganna.
Dagosna met nga impakaammo daytoy iti Baguio City Police Office (BCPO) Station 7, a dagus met a narespondean dagiti personnel ti pulisya.
Nakikoordinarda metlaeng iti CECU Baguio para iti panang-assess ken panangikabil iti umiso a disposisyon iti nasarakanda nga explosive ordnance.
Iti panag-assess ti autoridad, nakumpirmar a ti nasarakanda ket maysa a 75-millimeter (75mm) High Explosive Ammunition.
Ti 75mm High Explosive wenno HE ket maysa a kita ti bala a mabalin a mangpataud iti peggad iti seguridad iti publiko.
Iti agdama, addan iti kustodiya ti otoridad ti nasarakan a high-explosive ammunition para iti umiso a panangimanehar ken disposisyonna.
Kabayatanna, nagpalagip dagiti autoridad kadagiti residente a no makasarakda dagiti kapada a bambanag, kas iti bala wenno aniaman a maatap a paset ti eksplosibo, saanda daytoy a sagiden, garawen wenno ipan iti sabali a lugar.
Kasapulan metlaeng a dagusda daytoy nga ireport iti kaasidegan a police station tapno dagiti eksperto ti mangaramid iti umiso ken natalged a panang-assess iti nasarakan a banag.//via Bombo Khey Reparip
