Ikagkagumaan ti lokal a gobierno ti Baguio City a mangipaay iti ad-adu pay a lugar a pakaiponponan dagiti minatay, gapu paylaeng iti limitado nga espasio iti Baguio Public Cemetery.
Kas maysa a solusyon iti daytoy, paggep ti lokal a gobierno a kalien dagiti nabaybay-an wenno naabandona a tanem, nangruna kadagiti saan a nabayadan ti abangna iti uneg ti lima a tawen.
Natalantan daytoy kabayatan ti internal audit nga insayangkat ti City Environment and Parks Management Office (CEPMO).
Sigun iti kameng ti CEPMO, saan pay a mairugi ti nainget a panangimplementar iti nasao a polisia agsipudta ipangpangrunada nga ammoen ken bigbigen dagiti tanem a nabaybay-an wenno awanen ti mangay-aywan kadagitoy.
Inlawlawag na a maikabil iti bassit a kahon dagiti tulang a makali ken mamarkaan tapno masigurado a maisubli iti pamilya dagitoy.
Mailista metlaeng iti logbook ti petsa ti panangala kadagiti tulang babaen iti proseso ti exhumation ken dadduma pay a kasapulan a detalye.
Kabayatanna, ginuyugoy ti lokal a gobierno dagiti pamilya ken kabagian dagiti naiponpon iti Baguio Public Cemetery nga agbayad dagitoy iti abang tapno saan a maibilang a nabaybay-an dagiti tanem.
Mabalin a makikoordinar dagiti pamilya kadagiti personnel ti CEPMO iti uneg ti nasao a sementeryo tapno makaala dagitoy iti payment order slip sakbay nga agbayad iti Baguio City Health Office.
Sigun pay iti ahensya, saan a nagbaliw ti bayad ti panagrenta iti lote iti sementeryo a ₱20.00 tunggal tawen, maibilbilang daytoy a kababaan a singir no idilig kadagiti dadduma a public cemetery kadagiti dadduma a probinsia.
Impalagip metlaeng ti lokal a gobierno a napateg ti regular a panagbayad ken panangaywan kadagiti lote tapno mataginayon ti rekord dagitoy.//Bombo Khey Reparip
