Kinidaw ti House of Representatives kadagiti ahensya ti gobyerno a siguradoenda a maipaay a nasayaat ti agarup P6.2 Billion a tulong kadagiti mannalon ken mangngalap nga apektado iti nakaro a tikag.
Nadakamat ti nasao nga isyu kabayatan iti House Committee on Agriculture and Food nga indauloan ni Quezon Representative Mark Enverga no sadino natingiting nu pudno a dinmanon ti ayuda iti agarup 310,000 a mannalon ken mangngalap iti pagilian.
Kabayatanna, impeksa met ni Sultan Kudarat Representative Bella Suansing a kasapulan metlaeng a maipaay ti alternatibo a pagalaan dagiti mannalon ken mangngalap ti income da.
Malaksid iti dayta, rumbeng metlaeng a mapagpokusan ti epekto ti El Niño iti suplay ti danum,enerhiya, salun-at, ken pagbiayagan.
Impetteng metlaeng dagiti mammanday-linteg a rumbeng a saan a maitantan ti tulong kadagiti apektado gapu iti agtultuloy a pangta ti panawen iti produksyon ti taraon.
Kinidawda met kadagiti ahensya a mangisumitirda kadagiti nalawag a report ken dagos a panag-aksyon tapno masalwadan ti sektor ti agrikultura ken seguridad ti taraon iti pagilian.
