Ginuyugoy iti City Government ti Baguio ti publiko a makipaset kadagiti maisaysayangkat a drill mainaig iti panagsagana para iti posible nga emerhensiya kadagiti didigras kas iti gindgined.
Sigun kenni Sam Hamada, Chief of Staff iti City Government of Baguio, napateg daytoy tapno maamuwan ti publiko dagiti nasken nga aramidenda nu dumteng ti saan a namnamaen a ginggined.
Maipalagip a ti Pilipinas ket masarakan iti Pacific Ring of Fire, maysa kadagiti rehion iti lubong a masansan a makapadas iti ginggined gapu iti aktibidad dagiti fault ken tectonic plates.
Gapu iti daytoy, masapul a nakasagana ti publiko, nangruna dagiti pamilya, eskuwelaan, opisina ken dadduma pay a pagtrabtrabahuan.
Iti pannakipaset iti earthquake drill, maadalan dagiti umili ti umiso a panangsalaknib iti bagida babaen iti Duck, Cover, and Hold.
Babaen iti nasao nga addang, masursuro ken maikabisa ti publiko dagiti umno nga aramidenda sakbay, kabayatan, ken kalpasan iti gingined.
Kalpasan ti ginggined, masapul met nga agannad iti posible nga aftershocks, kitaen no adda nadunot, ken liklikan ti panagsubli kadagiti nadadael a pasdek agingga a maipatalged a natalged dagitoy.
Maipalagip met a naisayangkat iti 4th Nationwide Simultaneous Earthquake Drill (NSED) itay kallabes, maysa a quarterly activity a idadauloan ti Office of Civil Defense (OCD) tapno mapapigsa ti panagsagana ken koordinasion dagiti ahensia ken komunidad.
Ipalpalagip met dagiti otoridad a ti panagsagana ket saan laeng a maaramid bayat ti drill, nu diket masapul a maipatungpal iti inaldaw a panagbiag tapno maliklikan ti pannakaburibor ken mapagtalinaed ti kinatalged dagiti umili iti tiempo ti emerhensiya.
Gapu iti daytoy, maguyguyugoy iti publiko a saan laeng nga agpaset kadagiti naituding a drill no di ket ipatungpal met dagiti naadal a safety measures iti pagtaengan, pagadalan ken pagtrabtrabahuan dagitoy. // via Bombo Khey Reparip
