Kinumpirmar ti maysa nga opisial ti Davao City Assessor’s Office a nakarehistro kenni Atty. Manases Carpio, asawa ni Vice President Sara Duterte ti maysa a sanikua idiay Juna Subdivision, Matina Crossing, Talomo, Davao City.
Iti impeachment trial ita nga aldaw, dinamag ni defense lawyer Lindon Bacquel ni Davao City Assessor Engr. Jaime Adalin no sino ti nakarehistro nga agtagikua iti nasao a property.
Ditoy a kinumpirmar ni Adalin a ni Carpio ti nakarehistro nga agtagikua ken nakalanad metlaeng iti dokumento nga asawa daytoy ni Duterte.
Sigun kenni Adalin, dumanon iti P82,046 ti assessed value ti nasao a sanikua, bayat nga agarup P1.8 million ti market value daytoy.
Maipalagip a karaman iti impeachment trial ti pannakasukimat dagiti sanikua ken dokumento nga adda ti pakainaiganna iti saan a mailawlawag a kinabaknag ni Vice President Sara Duterte.
