Guyguyugoyen ti Malacañang dagiti estudyante a mangisumitirda iti position paper ken ilawlawagda dagiti pakaseknanda iti gobyerno mainaig iti singasing a pannakaipasdek ti Estados Unidos iti Pax Silica Economy Security Zone.
Sigun kenni Palace Press Officer Undersecretary Claire Castro a kasapulan a laonen ti position paper dagiti detalye seknan iti nasao nga issue tapno maysa-maysa dagitoy a mapagsaritaan.
“Dapat ito ay nakadetalye, dapat madinig sila ng Pangulo, ng administrasyon nang may detalyeng isyu para kung mayroon dapat na tugunan at dapat maresolba, dapat maayos,” sigun kenni Castro.
Mapangpanggep a maipatakder ti Pax Silica industrial hub idiay New Clark City, Capas,Tarlac. Nupay kasta, umaw-awat daytoy iti pammabalaw sipud idi naiyam-ammo daytoy iti publiko.
Maipalagip metlaeng a nangipatungpal dagiti estudyante manipud iti nagduduma nga unibersidad iti pagilian iti campus walkout kas panagiyebkas iti panagtubngar iti nasao a proyeto kasta metten iti plano a panagbisita ni US President Donald Trump iti Pilipinas.
