--Ads--

Binabalaw ni Vice President Sara Duterte ti hepe ti Philippine National Police (PNP) seknan iti nagbalin nga statement ti ahensya nga agtaltalinaed nga “apolitical” ti serbisyo nga ipapaay dagitoy.

Kagidan daytoy, inbutaktak ni VP Sara a saan a bumaba iti lima a pangta ti naawatna , pamilyana, ken dagiti staff ti OVP manipud iti sumagmamano a personnel ti PNP.

Impettengna a saan daytoy simple a political accusation ngem imbutaktakna daytoy gapu ta awan ti dadduma a pagkiddawanna iti tulong.

Innayonna a posible metlaeng a saanna a maipresenta dagiti ebidensya iti sangwanan ti impeachment proceedings kalpasan nga inbabawi ti prosekusyon ti reklamo a grave threat kontra kenkuana.

Inyebkas pay ti bise presidente a saanna a marikna natalged daytoy iti uneg ti pagilian kas marikrikna dagiti ordinaryo a Pilipino nga agdandanag iti seguridad da.

Gapu iti daytoy, indagadagna ti mangidadaulo ti PNP nga imbes a depensaan daytoy dagiti adda iti nangangato nga opisyales, ikanna laengen ti atensyon ti panangsigurado a patas ti panangsalwadda iti tunggal umili ti pagilian.

Iti agdama, awan paylaeng ti sungbat ti PNP seknan iti alegasyon ti bise presidente.//