Manaynayon ita ti bilang dagiti agasawa nga agak-akseptar iti family planning iti Cordillera sipud nangrugi ti COVID-19 pandemic idi 2020.
Sigun kenni Magdalena Abellera, Regional Director ti POPCOM-Cordillera, ado a pamilya ti napukawan ti panggedan nga ad-adda pay a nangparigat iti panagbiagda rason nga inkonsiderada ti panagplano.
Kinunana a nasurok 28,000 nga agasawa iti rehion ti naipasidong iti Family Planning Counselling gapu iti agtultuloy a kampanya ti ahensia.
Dinakamatna nga inakseptar dagiti agasawa dagiti nagduduma a family planning methods kas ti vasectomy kadagiti lallaki bayat a birth control pills met kadagiti babbai.
Impetteng ni Abellera a responsibilidad dagiti agasawa nga agplano seknan iti buklenda nga anak kas maibasar iti kapasidad ken kabaelan dagitoy.
Impaganetgetna a puntirya ita ti ahensia a maimpormaran dagiti maibilbilang a poorest of the poor, less educated, dagiti agkasapulan iti umno a birth spacing ken dagiti agtarigagay a saanen nga aganak tapno matulongan dagitoy nga agplano para iti pamilyada.
