BAGUIO CITY – Nadutukan ni Anti-Crime and Terrorism through Community Involvement and Support (ACT-CIS) Party-list Representative Eric Go Yap kas ‘caretaker’ ti Benguet Province.
Iti eksklusibo nga interview ti Bombo Radyo kenni Benguet Governor Melcor Diclas, kinunana a ni House Speaker Allan Peter Cayetano ti nangdutok kenni Yap kas ‘caretaker’ ti Benguet.
Kinunana a ni Yap ti mangtaripato ken mangibagi iti Benguet sadiay Kongreso kasaruno ti killaat nga ipupusay daydi Benguet Representative Nestor Fongwan Sr. idi napalabas a December 18, 2019.
Kinuna pay ni Gov. Diclas a naituding nga agturong sadiay Benguet ni Yap inton sumaruno a lawas.
Immunan nga inaprobaran ti Sangguniang Panlalawigan ti Benguet ti maysa a resolusyon a mangkidkiddaw iti special elections para iti baro ken permanente a kongresista ti probinsia.
Nailanad iti resolusyon a nasaysayaat ti special elections no idilig iti panangdutok ti Kongreso iti caretaker iti Benguet tapnu adda dagiti mangtutuk iti pagkasapulan ti probinsia.
Dinakamat met ni COMELEC – Cordillera regional director Atty. Julius Torres a kasapulan nga ideklara ti Kongreso a bakante ti napanawan a posisyon daydi Rep. Fongwan ken nasken nga adda ti komunikasyon ti Kongreso iti COMELEC no adda man ti maisayangkat nga special election.
Maipalagip a pimmusay daydi Rep. Fongwan gapu iti komplikasyon iti sakit daytoy.
Maibasar iti rekord, nakaputar ti opisyal iti 21 a gakat sadiay Kamara ken nagserbi daytoy iti publiko iti nasurok 30 a tawen kas konsehal, bise mayor, mayor ken gobernador.
