Inaprobaran ti Senado iti maikatlo ken maudi a pannakabasa ti addang a mangipalubos kenni President Ferdinand “Bongbong” Marcos Jr. a mangsuspender wenno mangpabassit iti fuel excise taxes.
Kabayatan ti plenary session idi March 17, pimmabor ti 17 a senador bayat nga awan ti negative votes ken abstentions iti Senate Bill No. 1982, wenno ti “An Act authorizing the President to suspend or reduce excise tax on petroleum products amending for the purpose Article 148 of the National Internal Revenue Code.
Ti nasao nga addang ket mangipaay kenni President Marcos Jr. iti emergency powers iti kanito a dumanon iti nasurok $80 ti tunggal bariles ti Dubai crude.
Maipalagip nga idi napalabas a lawas, senitipikaran ni President Marcos Jr. kas urgent ti nasao a gakat a mangipaay kenkuana iti bileg a mangsuspende wenno mangkissay iti fuel excise tax gapu iti tension sadiay Middle East.
