BAGUIO CITY – Ado nga online sellers iti lokalidad ti saan paylaeng a nakarehistro iti Department of Trade and Industry.
Inaklon daytoy ni DTI– Baguio-Benguet Provincial Director Atty. Samuel Gallardo iti panakiyuman ti Bombo Radyo.
Gapu iti daytoy, kinunana a marigatanda a mangduktal kadagiti online sellers a mairekreklamo iti opisinida gaputta saan a nailanad ti umno nga address dagitoy iti social media.
Kinunana nga innem agingga walo a reklamo ti maaw-awatda iti binulan no sadino sumagmamano kadagitoy ti maiyum-umanda iti Cybercrime Unit ti National Bureau of Investigation ken iti Criminal Investigation and Detection Group.
Imbinglayna a kadawyan a reklamo dagiti konsumers ti saanda a panangawat kadagiti orders dagitoy iti baet a naipatuloden ti kwarta kadagiti maseknan nga online sellers bayat a sumagmamano ti makaaw-awat iti nagpason a makan.
Adda pay dagiti saan nga umno nga items wenno nadadael a kagawaan a maipatpatulod dagiti saanen a makontak ti seller.
Inaklonna a narigrigat nga anupenda dagiti local online sellers ngem dagiti dadakkel a kompanya gaputta saan a lehitimo ti operasion dagitoy.
Gapu iti daytoy, mangbukel ti ahensia iti baro a regulasion para kadagiti online sellers.
Imbalakadna ni Atty. Gallardo kadagiti konsumers a kumpirmarenda pay ti ligalidad ti kompanya wenno ti online seller sakbay a maki-transaksion dagitoy.
Kinunana nga iyasidegda a dagos ti reklamoda kadagiti third party provider kas kadagiti administrator dagiti online shopping companies a gimmatanganda tapno saan a maiyawat iti seller dagiti imbayadda a kwarta.
Innayona pay a makiymumanda metlaeng kadagiti otoridad iti kanito a maobserbaranda ti kwestionable transaksionda kadagiti sellers tapno maaksionan a dagos ken maliklikan ti panakabiktima dagitoy.
