BAGUIO CITY- Manamnama a maksayan dagiti utot a tumartaray iti Baguio City Public Market babaen iti manarimaan a rat catching challenge.
Ti rat catching challenge nangrugi idi kalman, Mayo 20 ken agleppas inton Agosto 31, 2024.
Immuna a naipatungpal idi 2020 babaen iti initiatibo ni Mayor Benjamin Magalong para iti panggep a maksayan dagiti utot iti merkado publiko.
Iti pannakiuman ti Bombo Radyo kenni Daryll Kim Longid, dadaulo ti Public Order and Safety Division – Baguio, kinunana nga adda ti natiliw dagiti vendors a dua nga utot idi kalman ti agsapa, Mayo 20.
Sigun kenkuana, maipaayan iti premyo dagiti indibidual a makatiliw ti ado nga utot.
Maiyawat ti P25-K cash kas 1st prize , P15-K kas second prize, P10-K kas third prize ken P5-K kas last prize.
Kabayatanna, imbinglay ni Longid a parikut pailaeng dagiti drainage system iti uneg ti merkado publiko gapu kadagiti basura kas ti nagdalusan ti nateng, karne ken dadduma pay.
Gapu iti daytoy, kidkiddawenna ti pannakipaset ti publiko iti rat catching challenge tapno madalusan ken maliklikan ti panagwaras ti aniaman a sakit iti Baguio City Public Market.
