BAGUIO CITY – Im-imbestigaran ti pulisya ti panakatakaw ti dakkel a gatad a koleksion ti maysa a gasolinaan sadiay Poblacion East, Lagawe, Ifugao.
Maibasar iti report, nakaawat ti Lagawe PNP iti tawag manipud kenni Jose Mondiguing, ti agtagikua iti nasao a gasolinaan seknan iti panakatakaw ti koleksion dagitoy a dumanon ti agarup nasurok P317,000 iti rabii ti Dominggo.
Naamuan nga iti rabii ti Dominggo ket inrikep ken in-lock ni Danny Baluna, 23-anyos ken empleyado ti nasao a gasolinaan ti cashier’s office sakbay dagitoy a nagawid.
Nupay kasta, iti agsapa idi kalman ket nadiskubre ni Baluna a mapukpukaw ti nasao a gatad ti koleksion.
Awan met ti nakita a pagilasinan iti pwersado nga iseserrek iti cashier’s office ti nasao a gasolinaan.