BAGUIO CITY – Im-imbestigaran ita dagiti pulis ti panakapalpaltog ti agasawa a negosyante sadiay Payong, San Quintin, Alfonso Lista, Ifugao a nakatayan ti asawa a lalaki idi rabii ti Biyernes, November 29.
Nabigbig dagitoy a da Orlando Millare Dumlao Jr. ken Michelle Gallevo Dumlao, agpada a 34-anyos, negosyante ken residente ti Rumangay, Echague, Isabela.
Sigun kenni PCol. Romeo Wangwag, direktor ti Ifugao Police Provincial Office, nakalugan dagiti dua iti SUV nga addaan plaka nga ALA 5073 ken nagtaudda sadiay Isabela ken paturongda sadiay Alfonso Lista, Ifugao.
Kinunana nga apaman a nakadanun ti agasawa sadiay Payong, San Quintin, Alfonso Lista ket pinalpaltogan dagitoy ti dua nga armado nga indibidual a dagus a naglibas kalpasan ti krimen.
Nagsagrap ti agasawa kadagiti tama ti bala ti paltog ken iti panakaitaray dagitoy iti Potia District Hospital ket naideklara a dead on arrival ni Orlando Dumlao Jr.
Agpapaimbag metten ti asawa a babai bayat nga agtultuloy ti follow-up operation dagiti pulis tapnu mabigbig dagiti suspek ken maduktalan ti motibo ti krimen.
