Agbalballaag ita ti Aguinaldo MPS kadagiti amin a motorista a sumurotda kadagiti linteg iti kalsada, agaramat iti helmet, ken kanayun nga ipangpangrunada ti kinatalgedda .
Daytoy ket kalpasan iti maysa a vehicular accident idiay Sitio Maano, Brgy. Galonogon, Aguinaldo, Ifugao, rabii idi kalman a nakairamanan ti tallo nga estudayte no sadino maysa kadakuada ti pimmusay.
Sigun iti pablaak ti Aguinaldo MPS, naiyawag iti 911 ti nasao nga insidente pasado alas-nuebe ti rabii, a dagosda a nirepondean.
Apaman a nadanon dagiti otoridad ti nakapasamakan ti nasao nga aksidente, nakitada ti maysa a motorsiklo a nagluganan ti tallo nga estudyante. Ti nasao a motor, natennag iti deraas iti paset ti kalsada ti nadakamat a lugar.
Dagos met a naipatungpal ti rescue operation babaen iti nagtipon a puersa ti Aguinaldo MPS, BFP Aguinaldo, MDRRMO, dadduma nga opisyal iti nasao a lugar, pakairamanan ti sumagmamano a concerned citizens tapno maiya-onda dagiti biktima iti natalged a lugar.
Dua kadagiti biktima ti naisalba ken naitaray iti pagagasan bayat ti met maysa ket saanen a nakalasat.
Nagleppas ti rescue operation dagiti otoridad iti nasao a pasdek dandani alas dose iti tengngat rabii idi Sabado.//bombokaren.c.sapirao
