NUEVA ECIJA — Pinatunayan ni Irene Buyuccan, 59, na ang edad ay hindi hadlang sa pagkamit ng tagumpay matapos siyang tanghaling Female Champion sa Nueva Ecija Marathon 2026.
Matagumpay niyang nalampasan ang mahabang bypass road na sumasaklaw sa mga bayan ng Guimba at Cuyapo, kung saan ipinamalas niya ang tibay, disiplina, at determinasyon sa buong karera.
Kasama ang Ifugao Haggiyo Trail Runners at mga kaibigan, masayang tinawid ni Buyuccan ang finish line at ipinagdiwang ang kanyang kahanga-hangang tagumpay. Bukod sa pagiging kampeon sa kababaihan, natanggap din niya ang Toughest Runner Award at kinilalang Age Group (AG) Winner.
Itinuturing si Buyuccan bilang inspirasyon sa maraming mananakbo dahil sa kanyang sigla, dedikasyon, at patuloy na pagmamahal sa isport ng pagtakbo, na nagpapatunay na ang edad ay hindi sukatan ng kakayahang makamit ang tagumpay.
