Nagsublin iti normal ti sitwasyon idiay Qatar kalpasan iti panangatake iti Iran kadagiti base militar iti Estados Unidos idiay Doha.
Iti panakiuman iti Bombo Radyo kenni Mr. Romeo Villegas Jr., maysa a Pinoy Community Leader idiay Qatar, dagus metlaeng a nagsubli iti normal ti kasasaad iti nasao a pagilian kalpasan ti retaliation wenno counterattack na impatungpal iti Iran iti Al Udeid Air Base idiay Doha – maysa kadagiti kadaklan a base militar iti Estados Unidos idiay Middle East.
Sigun kenni Villegas, arigna awan ti napasamak nu sadino, sumagmamano kadagiti pagtrabahoan kas iti malls ken hospitals ti dagus a nagsubli iti operasyon kalpasan ti panagatake.
Nupay kasta,inaklon daytoy a saan latta a maliklikan dagiti Pilipino nga agdanag nangruna dagiti damo a makaimatang kadagiti airstrikes.
Kas maysa a lider iti Filipino community sadiay, kinuna ni Villegas a kanayonna a palpalagipan dagiti kakadwana a sarungkaran ti social media page ti embahada iti Pilipinas idiay Qatar tapno mapakaammoan dagitoy a dagus kadagiti napapateg a pakaammo.
Mainaig iti dayta, dinakamat ti nasao a community leader a sakbay ti airstrikes ket nagpakdaaren dagiti embahada iti nagduduma a pagilian idiay Qatar seknan iti daytoy, banag a nakaitunda iti komosyon.
Kabayatanna, impanamnama ni Villegas a nasayaat ti kasasaadda idiay Qatar ken kidkiddwenna ti saan a panagdanag dagiti adda iti Pilipinas a kapamilya dagiti OFW idiay Qatar.
Maipalagip nga ita laeng a lawas ket nangipatayab ti Iran iti medium-range missiles iti Al Udeid Air Base iti Estados Unitos idiay Doha, Qatar kasaruno ti panangatake iti US iti Iranian Nuclear Sites idi laeng Domingo.//Bombo Rob Dominguez
