BAGUIO CITY – Nagpalawag ti ama ti Mankayan, Benguet iti agtultuloy a panakailista ti double digit wenno nangato unay a kaso ti COVID-19 sadiay.
Sigun kenni Mayor Atty. Frenzel Ayong, resulta daytoy ti manarimaan a contact tracing kadagiti nakapulapol dagiti immuna a nagpositibo iti COVID-19 sadiay ken iti agtultuloy nga expanded testing iti uneg ti mining camp ti munisipyo.
Kinunana a kaaduan kadagiti nagpositibo ket awanan ti sintomas ken dagitoy ket agtatrabaho iti uneg ti Lepanto Mining Company.
Namnamaenda a manayonan pay dagiti kaso ti COVID-19 sadiay iti kanito a rumwar ti resulta ti expanded testing.
Dinakamatna nga agisayangkat pay ti Bases Conversion and Development Authority iti sabali a mass testing iti mining camp sadiay Mankayan ken kadagiti barangay nga asideg iti pagminasan.
Innayonna a naipasidongen iti total lockdown ti mining camp sadiay Mankayan, partikular iti Barangay Paco ken ti Sitio Marivic iti Barangay Sapid agingga inton December 20 gapu iti panagngato ti kaso ti COVID-19 kadagitoy.
Naipalubos met ti panagtuloy ti operasyon ti pagminasan ngem naksayan ti bilang dagiti innaldaw nga agtatrabaho sadiay.
Manarimaan pay ti panakikoordinar ti lokal a gobyerno kadagiti pagadalan sadiay tapnu mailukat dagitoy kas isolation facilities para kadagiti agpositibo nga umili nangruna ta napunnon dagiti agdama nag isolation facilities sadiay.
Maibasar iti datus, nasuroken iti 400 ti pakabuklan a kaso ti COVID-19 sadiay Mankayan, Benguet a nakatayan ti maysa nga indibidual ken maikapat ti munisipyo kadagiti ili iti Benguet nga addaan ti nangato a kaso ti COVID-19.
