BAGUIO CITY- Nasuspindir ti akreditasyon ti Benguet General Hospital (BeGH) iti PhilHealth iti uneg ti tallo a bulan ken napatawan daytoy iti mula a P10,000.
Nailanad iti pammilin a naawat ti ospital nga epektibo ti suspension inton March 15 agingga inton June 12 ken iti las-ud ti nasao a panawen ket saan a bayadan ti PhilHealth dagiti amin a claims dagiti miembro daytoy a naka-confine iti BeGH iti kapada a panawen.
Naamuan nga intunda daytoy ti pammilin nga impaulog ti PhilHealth para iti panakaimplementar ti desisyon iti reklamo nga administratibo a naipila kontra iti BeGH idi pay December 18, 2011.
Naawat ti BeGH ti pammilin idi pay December 10, 2020.
Nupay kasta, kinuna ni Benguet Congressman Caretaker Eric Yap a manarimaan ti komunikasyonna kada PhilHealth Dante Gierran ken Health Secretary Francisco Duque III para iti panakaisanod ti nasao a pammilin ken naamuanna nga addan iti ima ti Board of Directors ti PhilHealth ti gasat ti apelada a saan a panakaimplementar ti nasao a suspension.
Impettengna a saan a daytoy ti panawen para iti implementasyon ti nasao a suspension gaputa no maituloy ket agresulta iti binulan a lugi a P14-M ken nakaro a maapektaran dagiti umili nga agnumnumar iti libre ken epektibo a serbisyo para iti salun-at.
Kinunana a mangnamnama daytoy iti pabor a desisyon iti apelada ngem no saan man ket addan ti nakasagana a plano daytoy tapnu agbalin a pabor kadagiti umili ti agdama a sitwasyon.
