BAGUIO CITY – Manarimaanen ti nagsina a panangimbestigar ti Public Order and Safety Division (POSD) ken ti Baguio City Police Office (BCPO) – Station 2 iti alegasyon nga adda ti inruar ti maysa kadagiti apprehending enforcers ti POSD nga igam iti napasamak a panagsinnungbat iti nagbaetanda iti maysa a driver ti parapubliko a jeep sadiay Magsaysay Avenue, Slaughter Compound, Baguio City.
Iti interview ti Bombo Radyo Baguio, kinuna ni POSD Deputy Chief Daryl Kim Longid a ti alegasyon nga adda ti igam nga inruar ti maysa nga enforcer-da ti nakaipamaysaaan ti imbestigasyonda ita gaputa narisut metten iti kapada nga aldaw sadiay BCPO-Station 2 ti saan a nagkinnaawatan dagitoy.
Sigun kenkuana, iti panagpapatang dagiti maseknan ket inaklon ti maseknan a driver ti jeep ti panaglabsingna iti linteg trapiko ken nagpinnakawan ti dua a benneg iti naaramidda a panagpinnangta.
Impasiguradona met a no mapaneknekan a pudno ti alegasyon ket maipataw ti kaskenan a pannusa iti maseknan nga enforcer nangruna ta saanda a kankanunungan ti kinaranggas iti panangipatungpal iti serbisyo publiko.
Innayonna a babaen iti daytoy ket mapaneknekan ken masustinir ti commitment ti POSD a panangdalus kadagiti personnel-da nga agar-aramid iti maikaniwas ken saan a propesyonal.
Inyunay-unay manen ni Longid a kanayon a nakalukat ti opisinada iti asinoman nga adda ti reklamona kontra kadagiti miembro ti POSD ken iti panagtiliw dagitoy.
