BAGUIO CITY – Nainget a pinaglibakan ti Police Regional Office- Cordillera ti alegasyon nga adda ti mapaspasamak a “nepotism” ken “kapit sytem” iti manarimaan a recruitment ti PNP para kadagit interesado a sumrek kas police officer 1.
Iti panakiuman ti Bombo Radyo kenni PCI Lambert Grad manipod iti Regional Personnel and Human Resource Development Division, kinunana a nainget ken transparent ti ipatpatungpal dagitoy nga screening ken nagduduma nga eksaminasyon para kadagiti nagaplikar.
Kinunana a kanayun ken tinnawen nga adda ti kapada a reklamo a maaw-awatda ken posible a dagiti agrekreklamo ket dagiti saan a naawat wenno nakastrek kabayatan ti screening.
Nupay kasta, imbalakadna a saan a maupay dagiti aplikante iti kanito a saan dagitoy a naala iti umuna a gundaway ken saanda nga agakusar iti ‘kapit-system.’
Inlawlawlagna pay a ti PNP ken NAPOLCOM ti mangipatpatungpal iti screening mangrugi iti online application, Physical Agility Test, Neuro Examination, medical ken dental examination agingga nga aprobaran daytoy ti Regional Recuitment Screening Committee.
Innayonna nga iti agdama ket manarimaan pay laeng ti evaluation ti neuro exam dagiti aplikante a nakastrek iti kaleppas a Regular Recruitment Quota a bukbuklen ti nasurok duagasut a babbai ken innem a gasut a lallaki.
Kinunana met a dagiti mapili a mangkompleto iti walogasut a quota ket manamnama nga agsapata inton Hulyo.
Kagiddan iti daytoy ket agtultuloy met ti aplikasyon para iti 200 nga Attrition qouta ti Cordillera PNP.
