Tiniliw dagiti otoridad ti ama a nangrames iti bukodna nga anak iti namin ado a daras idiay San Isidro, Isabela itay nabiit.
Iti interview ti Bombo Radyo Cauayan, kinuna ni PMaj. Grandeur Tangonan, Chief of Police ti San Isidro Police Station, ti biktima ket agtawen laeng iti sangapulo ket tallo.
Maibasar iti salaysay ti biktima, namin tallo a daras a nirames daytoy ti amana manipud 2022 agingga 2023.
Sigun kenni PMaj. Tangonan, napasamak ti krimen bayat ti kaadda ti ina iti ballasiw-taaw.
Kinuna met ti biktima a masansan nga aginom iti arak ti amana ken tunggal mabartek ket aramidenna ti nasao a krimen.
Saan a dagus a nakapagpulong ti biktima gapu iti panangpangta ti amana.
Nadlaw laengen ti guidance counselor ti panagbaliw iti behavior ti biktima iti pagadalanda rason a kinasaritana daytoy agingga a nagpudno ti biktima.
Dagus met a nakikoordinar ti guidance counselor iti ina ti biktima maipapan iti ar-aramiden ti asawana iti mismo nga anakda a nangitunda iti pannakatiliw ti suspek.
Kasaruno iti daytoy, pinalagipan ni PMaj. Tangonan dagiti nagannak nangruna dagiti inna a nu mabalbalin ket saanda a panawan wenno ipabiang dagiti annakda a babbai kadagiti lallaki a miyembro ti pamilyada.
Impalagipna metlaeng a rumbeng nga isina ti kwarto dagiti annak ken rumbeng nga awan ti kaidda dagitoy nangruna nu bumalbalasangdan tapno maliklikan ti kapada nga insidente.
