BAGUIO CITY – Supsuportaran ti mayor ti Baguio City ti apela dagiti transport sector iti Land Transportation Franchising Regulatory Board (LFRB) a pannakaitantan ti implementasyon ti public utility vehicle wenno PUV modernization program.
Kagiddan paylaeng daytoy ti epekto ti COVID-19 pandemic iti ekonomiya iti nasao nga sektor.
Sigun iti mayor, nakiuman daytoy kadagiti miembro dagiti transport sector partikular dagiti nagkiddaw a maitantan pay ti timeline ti PUV modernization program tapnu maipaayanda iti gundaway nga agrekober manipod iti epekto ti pandemya ken panagngato iti presyo dagiti produkto ti petrolyo.
Kinunana nga ur-urayenna laengen ti manifesto nga isubmitir dagitoy tapnu iyendorsona iti Department of Transportation (DOTr).
Mailanad iti manifesto ti bilang ti tawen wenno panawen a kiddawen ti sektor tapnu maitantan ti modernization program.
Inyunay-unay ti mayor a saan pay a matungpal dagiti transport sektor, jeep ken taxi dagiti maikalikagum iti modenization program iti epekto ti pandemya ken panagngato ti presyo ti petrolyo isunga mangnamnama daytoy iti konsiderasyon ti DOTr.
Immunan nga impasa ti lokal a konseho iti siudad ti Resolution No. 671, series of 2020, a mangkidkiddaw iti LTFRB nga ikonsiderda dagiti nagduduma nga isyu ken pakaseknan nga inyapela ti local transport groups mainaig iti epekto ti plano nga PUV modernization a mangipasigurado nga awan ti madisplaced nga PUV.
Maipalagip nga idi June 19, 2017, naipaulog ti DOTR Department Order No. 2017-11 a mangibilbilbin a sakbay ti ngudo wenno panagleppas ti December 2020 ket amin dagiti bus, taxi, utility vehicle (UV) express, jeepney operators ken drivers ket sumurotda wenno maiyannatopda iti sidong ti PUV modernization program ta nu saan ket agpaso ti prangkisa dagitoy.
