BAGUIO CITY- Agpalpalagip manen ti Atok Municipal Police Station (Atok MPS) iti publiko para iti doble a panagridam dagiti motorista kabayatan ti panagbiahe dagitoy kasaruno dagiti nagsasaruno nga aksidente ti lugan a nailista sadiay.
Iti interview ti Bombo Radyo Baguio ken Atok MPS Chief of Police PMAJ Gregorio Kiwalan, kinunana a dumanon iti 4 nga aksidente iti lugan ti nailistada manipod Enero agingga iti kaudian nga aksidente a nailista idi Abril 18.
Kinumpirmarna met nga addan iti natalged a kasasaad ti maysa a mannalon kalpasan a natnag ti naglugananna iti maysa a derraas sadiay Calasipan Catubo, Atok Benguet idi Abril 18..
Immunan a nabigbig daytoy a ni Rex Mauricio Dap-ing, 26 anyos, ken residente ti Buguias, Benguet nu sadinno naduktalan iti imbistigasyon a saan a nakontrol ti driver ti iman-manehona a lugan gapu iti kinagalis ti kalsada agingga a naidungpar iti road barrier ken nagderetso iti rangkis nga addaan kauneg a 200 a metro.
Gapu iti dayta, impaganetget ni Kiwalan a nasken a sukimaten dagiti motorista ti konsdisyon dagiti lugan nga imanmaneho dagitoy kasta metten iti panaginnayad iti panagmaneho tapnu maliklikan dagiti kapada nga aksidente.
