Agleppas ti roadshow ti Automated counting machines (ACMs) ti Commission on Elections (COMELEC) inton ngudo iti Enero ita a tawen.
Ti panakaipatungpal ti Automated counting machines (ACMs) roadshow kadagiti nagduduma a paset ti pagilian ket addaan panggep a mangipakaammo kadagiti Pilipino a botante ti baro a makina, nu kasano daytoy a maaramat ken para iti panakaiyunay-unay maipapan iti kinapateg ti panagaramat dagiti Pilipino iti karbengan dagitoy nga agbotos.
Iti panakiuman ti Bombo Radyo kenni Atty. Julius Torres, Regional Director ti Commission on Elections-Cordillera, dagiti makina a naaramat iti roadshow ket maisubli iti Main office gaputa mausar met laeng daytoy inton May 12, ti aldaw ti eleksyon iti pagilian para iti 2025 National ken Local Midterm Elections.
Sigun kenni Atty. Torres, naituding met ti panagsanay dagiti agserbi nga electoral boards para iti umadanin nga eleksyon.
Kabayatanna, ado nga aktibidad ti Commission on Elections ti nakalinya kagiddan ti umadanin a panagrugi ti election period a inton January 12.
Innayon ni Atty. Torres nga iti panagrugi ti election period ket maipatungpal ti COMELEC checkpoint para iti implimentasyon ti gun ban, ti panakaiparit ti panagawit kadagiti igam iti ruar ti pagtaengan malaksid nu adda iti pammulobos manipod iti Commission on Elections.
Dagiti mabalin a mailaksid iti gun ban ket dagiti adda iti law enforcement agencies ken dagiti indibidual a maibilbilang nga at risk.
Innayon ti Regional Director a malaksid iti COMELEC checkpoint ket mangipatungpal metlaeng ti Philippine National Police iti regular checkpoints dagitoy a paset ti pagrebbenganda.
Maipaspasigurado met a dagiti aglabsing iti pagalagadan seknan iti gun ban ket maipaayan iti pannusa a panakaibalud iti maysa agingga innem a tawen kasta met a madiskwalipikar dagitoy iti panagngayangayda iti eleksyon.//Bombo Mera Pacpacan
