Pinasingkedan manen ti Malacañang nga agtuloy ti Ayuda sa Kapos ang Kita Program (AKAP) ti gobierno iti tengga ti masungad nga eleksion.
Impaganetget ti Malacañang nga adu a Pilipino ti agpannuray iti tulong para iti inaldaw a kasapulanda.
Sigun kenni Palace Press Officer Undersecretary Atty. Claire Castro, narigat a maisardeng ti panangipaay ti ayuda kadagiti Pilipino gaputa agpanpannuray metlaeng dagitoy iti nasao a banag.
Binigbig ni Castro ti umad-adu a bilang dagiti mabisbisin iti baet nga adda dagiti agdama a programa.
Maipalagip a sumagmamano a grupo ti nangipila ti petision sakbay iti Korte Suprema a mangkidkiddaw ti temporary restraining order iti panangimplementar ti Ayuda sa Kapos ang Kita Program (AKAP) iti sidong ti 2025 national budget.
