BAGUIO CITY – Nakemmeg ti maysa a high value target a babai ken tallo a kakadwana iti buy-bust operation nga insayangkat ti nagtipon a puwersa ti Baguio City Police Office – Station 2 ken Philippine Drug Enforcement Agency-Cordillera sadiay East Quirino Hill, Baguio City idi kalman.
Nabigbig ti babai a ni Alona Cantela Dienla, 35-anyos, tubo ti Montreal, Masbate ken residente ti East Quirino Hill, Baguio City.
Nakemmeg metlaeng dagiti tallo a kakadwana kalpasan nga inaklonda a karamanda iti iligal nga aramid ni Dienla, partikular ti panagserbida kas drug couriers.
Nabigbig dagitoy a da Mahyen Espana, 35-anyos, balasang, tubo ti Santa Maria, Pangasinan; Jason Aquino Pertobal, 29-anyos, baro, tubo ti Binalonan, Pangasinan; ken ni Alfeo Hopana Alfaro, 29-anyos, tubo ti Dolores, Abra ken bin-ig a residente ti East Quirino Hill, Baguio City.
Nakumpiskar kadagiti nakemmeg nga indibidual ti siyam a pakete ti mapapati a shabu, P500 a kwarta, P3,500 a boodle money, maysa a pouch ken cellphone.
Sumangsango dagitoy iti kaso a panaglabsing iti RA 9165 wenno ti Comprehensive Dangerous Drugs Act of 2002.
