Naartapanen ti siudad ti Baguio ti “carrying capacity” daytoy, nga isut kangatuan a bilang dagiti indibidual a mabalin a suportaran dagiti “natural resources” ti siudad.
Daytoy ket maibasar iti panagadal ti National Economic and Development Authority (NEDA), nga iti agdama ket Department of Economy, Planning and Development.
Ti panagadal ket impakaamo ni Samantha Jean Hamada, Chief of Staff ti Mayor’s Office bayat ti presentasyon ti state of local governance report iti regular executive-legislative meeting itay nabiit.
Sigun kenni Hamada, ti siudad ti Baguio ti maysa kadagiti agtultuloy ti panagdur-asna ken ti panagbalbaliw.
Ngem kagiddan iti nasao a banag, kinuna ni Hamada a kas ti dadduma nga urban areas, agtultuloy metlaeng ti adu a karit a mapaspasaran iti siudad.
Karaman ti sumagmamano nga institutional challenges a kas ti understaffing; nakapuy nga imprastruktura a kas kadagiti saan pay a nalpas a classroom ken farm-to-market roads, ken dagiti pagkurangan ti pannakaammo ken kababalin ti publiko, nangruna kadagiti health services, civil registration, disaster preparedness and environmental compliance, ken dadduma pay.
Naipakaamo pay iti panagtaripnong a maysa ti environmental stress kadagiti agtaltalinaed a nangato a parikut gapu iti kinakurang ti waste disposal facility, nasayaat a water source, daga, ken energy management.
Tapno marisut ti nasao a karit, kinuna ni Hamada a ti siudad ket iwanwanawan ti strategic direction nga addaan iti tallo a napapateg a components a kas ti sustainability, resiliency ken innovation.
Kabayatanna, kalpasan ti walo a bulan a kolaborasion iti nagduduma a sektor ken amin a barangay, kinuna ni Hamada a baro itan ti vision ti siudad a “Baguio 2034: A livable, inclusive and creative city.”
