BAGUIO CITY – Nabigbig ti siudad ti Baguio kas numero uno iti entero a pagilian iti ruar ti National Capital Region (NCR) a nakaisayangkat ti panagbakuna.
Inwaragawag daytoy ni Interior Secretary Eduardo Año kabayatan ti pre-recorded address ni Presidente Duterte idi kanikadua.
Kinunana nga iti ruar ti NCR ket ti Baguio ti kaaduan ti naisayangkat a panagbakuna a dimmanon iti 99,745.
Simmaruno iti Baguio City ti siudad ti Cebu ken Cagayan de Oro.
Gapu iti daytoy, kidkiddawen ni Año ti panagbiruk dagiti lokal a gobyerno iti wagas ken istratehiya tapnu maallukoy ti ad-adu pay a residente daigtoy nga agpabakuna.
Kabayatana, inwaragawag ni Mayor Benjamin Magalong nga inton sumaruno a bulan ti Hulyo ti panagsangpet ti umuna a batch ti AstraZeneca vaccines nga inorder ti lokal a gobierno.
Sigun kenkuana, manamnama a makaawat ti Baguio City ti 11,000 doses ti Astrazeneca vaccines.
Kinunana a limitado laeng ti sumangpet a bakuna iti siudad gaputa nabingay daytoy ken maipaay kadagiti dadduma a lugar iti Pilipinas.
Imbinglayna nga inton Agosto ket manamnama a makaawat ti siudad ti kanayonan nga 18,000 doses ti Astrazeneca vaccines.
Maipalagip a nag-order ti siudad iti 390,000 doses ti Astrazeneca vaccines.
