BAGUIO CITY – Nakwalipikar ti Baguio JKrayonz Dance Crew a mangibagi iti Pilipinas iti United Dance Organization-Asia Pacific idiay Si Racha Bangkok, Thailand inton Abril a tres angingga Abril a ocho.
Iti panakiuman ti Bombo Radyo kenni Wreigh Jann Tamayo, coach ken choreographer ti JKrayonz Dance Crew, manarimaan ti panagsaganada para iti nadakamat a pasalip nu sadino panggepda a nayonan ti cordilleran twist ti hip-hop ken streetdance choreography a bukbuklen dagitoy.
Immuna metten a nakisalip ti nasao a grupo iti naangay a qualifying round idiay Lingayen, Pangasinan itay laeng kanikadua nu sadino sigun kenni Tamayo ket pinasetan metlaeng dagiti agkakalaing a dance groups.
Ti agballigi iti United Dance Organization-Asia Pacific ti makwalipikar a makisalip iti world competition a maangay idiay met United Kingdom.
Iti sabali a bangir, maibilbilang kas maysa a collective team ti JKrayonz Dance Crew gapu ta bukbuklen dagiti estudyante manipod iti nagduduma a pagadalan iti Baguio City ti miembro daytoy, kasta met nga adda pay dagiti sigud a miembro ti Archers Dance Troupe ken ti Koolitz Dance Crew.
Kinuna met ni Tamayo a maipangpangruna ladta ti academics dagiti ubbing iti baet ti panagsanay ken napintas nga oportunidad dagitoy.
Kabayatanna, ti laeng nagbalin a karit iti manamnama a panagturong ti nasao a grupo idiay Thailand ket ti kinaawan ti passport dagiti dadduma a miembro ngem dagus a narisut daytoy babaen iti tulong ni Baguio City Mayor Benjamin Magalong iti naparpartak a panakaiproseso daytoy.//Bombo Rob Dominguez
