Impaganetget iti Baguio City government a nakadepende ti agtultuloy a panagdur-as iti turismo iti epektibo a panangimanehar iti siudad kas maysa a sustainable destination, ken saan laeng nga iti panagadu dagiti sumarsarungkar a turista.
Iti mid-year general assembly iti Hotel and Restaurant Association of Baguio (HRAB), kinuna ni Mayor Benjamin Magalong a numan pay dakkel ti kontribusion ti turismo iti ekonomia ken trabaho, sangsangwenna dagiti karit a kas iti nakaro a trapiko, pannakadadael iti aglawlaw, epekto iti climate change, ngumatngato a gastos iti operasion, ken panangaywan iti siudad.
Impaganetget ni Magalong a dagiti programa iti siudad a kas iti Smart City initiatives, circular economy, panangpasayaat iti traffic ken mobility, panangaywan iti aglawlaw, disaster resilience, ken panangpapigsa iti public-private partnerships.
Guygoyugoyenna dagiti kameng iti Hotel and Restaurant Association of Baguio nga ital-o ti responsable a negosio, panagkessay iti basura, panagtipid iti kinabaknang iti aglawlaw, panagsuporta iti lokal a produkto, ken panangipaay iti dekalidad a kapadasan kadagiti turista.
Kabayatanna, imbinglay ni Baguio Congressman Mauricio Domogan dagiti singasing a linteg a panggepna a mangpapigsa iti turismo, karaman ti panagikkat iti travel tax, panangbukel iti Tourist Protection and Assistance Council, panangisakad iti sustainable ken community-based tourism, One Town, One Tourist Attraction program, ken panangibangon iti Cordillera Autonomous Region (CAR).
Impettengna a dagitoy ket makatulong iti panangpasayaat iti kinatalged dagiti turista, imprastruktura, ken nabayag a competitiveness iti sektor iti turismo.
