BAGUIO CITY – Inlawlawag ti general manager ti Benguet Farmer’s Cooperative a ti nangato a presyo ita dagiti nateng ket epekto ti prize freeze nga impaulog ti gobyerno para iti entero a Luzon kasaruno dagiti naglabas a bagyo.
iti panakiuman ti Bombo Radyo Baguio, kinuna ni Agot Balanoy a nairana nga idi naipatungpal ti price freeze ket nangato ti presyo dagiti nateng nga intunda met ti epekto dagiti bagyo a Rolly ken Ulysses.
Sigun kenkuana, dumanonen iti 60% ti ngimmatuan ti presyo dagiti nateng kas iti patatas nga aggatad ita iti P45-55/kilo; wombok a P60-65/kilo; repolyo a P70-80/kilo ken carrots a P30-60/kilo.
Imbinglayna a kas kadagiti konsyumer ket adu met a mannalon ti agriri iti nasao a price freeze gaputa dakkel ti lugida gapu iti pandemya ken bagyo.
Kabayatanna, impanamnamana nga umdas ti suplay ti nateng ita a holiday season nupay adu kadagiti mannalon ti bassit ti nagmula gapu iti amak a malugi manen dagitoy.
