BAGUIO CITY – Dumanonen iti 12 a bangkay dagiti Cordilleran nga OFWs ti naisangpet ditoy rehion ita a bulan ti Nobyembre babaen iti panagaksion ti Overseas Workers Welfare Administration (OWWA) – Cordillera.
Sigun ken ni OWWA – Cordillera Supervising Administrative Officer Edgar Melchor Laigo, dua kadagitoy ti pimmusay gapu iti COVID-19 bayat a ti 10 ket pimmusay gapu iti dadduma a rason a saan a konektado iti coronavirus.
Dinakamatna a ti dua a pimmusay gapu iti COVID-19 ket residente ti Benguet ken Baguio City.
Innayonna a manarimaan pay ti panakaiproseso ti pannakaiyawid ti dadduma pay nga OFWs a Cordilleran a pimmusay.
Sigun kenkuana, dagus a maipasidong iti cremation dagiti pimmusay gapu iti COVID-19 apaman a maisangsangpet ditoy pagilian kas maitunos iti paglintegan kontra iti COVID-19.
Impanamnama ni Laigo nga adda ti maited a tulong pinansial iti pamilya dagiti pimmusay nga OFWs ngem depende ti gatad no aktibo a miembro ti OWWA ti maseknan nga OFW wenno saan. –
