BAGUIO CITY – Nasarakan ti maysa a bangkay a tumtumpaw iti karayan sadiay Gawana, Tocucan, Bontoc, Mt. Province idi kanikadua.
Naireport iti pulisya ti panakasarak ti maysa a bangkay a tumtumpaw iti karayan.
Dagus met a nagresponde dagiti pulis, bombero, Bontoc Municipal Health Office ken dagiti barangay officials.
Ditoy a narekoberda ti nasao a bangkay nga imbal, marunrunot ken saanen a mabigbig.
Naitabon ti bangkay iti deppaar ti Bontoc-Kalinga National Road iti nagbeddengan ti Tocucan, Bontoc ken Anabel, Sadanga sadiay Mountain Province kas desisyon dagiti opisyal ti Tocucan ken ti Municipal Health Officer ti Bontoc.
Umap-apela met dagiti pulis kadagiti mapukpukawan ti kabagian tapnu makikoordinar wenno apanda kitaen ti ladawan iti istasyon ti Bontoc PNP.
