INDONESIA- Nasarakanen ti bangkay dagiti dua a Singaporean nationals a mapukpukaw gapu iti panagbettak ti bulkan a Mount Dukono sadiay Indonesia.
Nasarakan dagiti recuers ti bangkay dagiti biktima, partikular iti crater rim ti nasao a bulkan.
Sigun kenni Iwan Ramdani, mangidadaulo iti local rescue agency, naitantan paylaeng ti pannakaibakwit dagiti bangkay gapu iti agtultuloy a panagbettak a mapaspasamak ken dakes a paniempo.
Maipalagip a napasamak ti panagbettak ti bulkan idi Biernes ken agtultuloy paylaeng agingga iti agdama.
Pito a Singaporeans ken 10 nga Indonisians ti nakalasat iti insidente.
Nakasubli metten iti bukodda a pagilian dagiti pito a nakalasat a Singaporean, bayat a saan paylaeng a masigurado ti pannakaiyawid ti bangkay dagiti dua a pimmusay.
