BAGUIO CITY – Naiyawiden sadiay Bagabag, Nueva Vizcaya ti bangkay ti maysa a retired colonel a biktima ti pammaltog a nasarakan sadiay Asipulo, Ifugao idi kanikadua.
Nabigbig daytoy a ni Oscar Fernandez Ibarra, 52-anyos ken retired colonel ti Philippine Air Force.
Nagsagrap daytoy iti dua a tama ti paltog, no sadino, maysa iti kanigid a lapayag ken maysa iti kanigid a kili-kili.
Sigun kenni PCIns. Leo Guay, hepe ti Asipulo Police Station, dimmalan ti agbisbisikleta a biktima iti kwerpo dagitoy ken impaka-ammona nga agturong daytoy iti nangato a paset ti kalsada iti nasao a munisipyo.
Binallaaganda ti biktima a napeggad ti nasao a lugar gapu iti napasamak nga engkwentro ti militar ken rebelde iti kabangibang a lugar ngem nagtuloy latta ti biktima.
Kinunana a naklaatda laengen idi naamuanda a nasarakan ti bangkay ni Ibarra sadiay Sitio Liwon, Barangay Amduntog iti asideg ti bisikletana iti kalsadang nga asideg met iti view point ti barangay.
Naamuan a mapukpukaw ti sumagmamano a personal a kagawaan ti biktima partikular ti cellphone ken pitaka daytoy.
Iti agdama ket agtultuloy ti imbestigasyon ti pulisya tapnu maamuan ti motibo ken pakabigbigan ti suspek.
