BAGUIO CITY – Mangnamnama ti Barangay Affairs Office iti Baguio City iti kanayunan nga honorarium wenno sweldo para kadagiti barangay officials.
Kagiddan daytoy ti sinagsing ti 19th Congress a karaman kadagiti aramidenda ti pannakaitantan ti Barangay ken SK elections intun Disiembre.
Iti interview ti Bombo Radyo Baguio kenni Benjamin Macadangdang, Assistant Executive Secretary ti Brgy. Affairs Office, kinunana nga awan met ti parikot iti panakaitantan manen ti eleksion.
Nupay kasta, karaman kadagiti supsuportaranda a manayunan met ti sweldo wenno benepisyo dagiti opisyales ti barangay.
Sigun kenkuana, kurang ti honorarium nga maaw-awat dagiti nadakamat nga opiyales iti baet ti kinadagsen met ti trabaho dagitoy.
Inyunay-unayna met a babaen ti umdas a sweldo kadagitoy ket agbalin a produktibo dagiti opisyales a mangtutok kadagiti programa iti sakopda a barangay.
