BAGUIO CITY – Naipasidong iti lockdown ti Barangay Dontogan, Baguio City kalpasan a nairekord sadiay ti kabaruan a kaso ti COVID 19 ditoy siudad.
Imbilin ni Mayor Benjamin Magalong ti pannakai-lockdown ti barangay nangrugi idi kalman.
Idi kalman ket nagpositibo iti COVID-19 ni Major Rafael Baldado Roxas, deputy chief ti Fingerprint Division Headquarters ti Philippine National Police Crime Laboratory, agtawen daytoy iti 41 ken residente ti Brgy. Dontogan, Baguio City.
Maibasar iti pammilin ti mayor, naipasidong iti lockdown ti nasao a barangay tapno naurnos ti pannakaipatungpal ti contact tracing kadagiti nakapulapol ti nasao a pulis.
Gapu iti daytoy, suspendido ti pannakaaramat dagiti home quarantine pass dagiti residente.
Mabalbalakadan dagiti residente a masapul a gumatang iti taraon nga agturong dagitoy iti satellite market, iti rolling store wenno makikoordinar dagitoy kadagiti opisial ti barangay.
Iti agdama ket nainget a mabambantayan dagiti entry ken exit points ti Dontogan, Baguio City.
