BAGUIO CITY- Nainagananen ti maitudtudo a mastermind iti ipupusay ti maestro sadiay Bangued Abra idi Setyembre 28.
Daytoy ket ni Barangay Captain Armando Wilson, residente ti Dumagas, Boliney, Abra.
Ni Wilson ti itudtudo dagiti uppat a suspek a da Romel “Ambong” Paa, ti gunman; Sonny Boy Gandeza Tullas, driver ti gunman; Aldrin Alagao, lookout ken Abelardo “Abe” Talape, middle man, nga immunan a natiliw ken napilaan ti kaso.
Immunan a kinuna ni Abra PPO Acting Provincial Director PCol. Many Castillo Cula, inaklon dagiti uppat a suspek a nabilin laeng dagitoy a mangpaltug iti biktima kasukat ti P100-K.
Sigun pay kenni PCol. Cula, apa iti daga ti makitkita a rason iti krimen.
Maipalagip nga idi Setyembre 28, ket paturong ni Rudy Steward Dugmam Sayen iti Suyo National High School tapno agisuro.
Nupay kasta, sinurot daytoy dagiti uppat a nakamotorsiklo a lalaki ken pinaltuganda iti namin dua a daras.
Naitaray ti biktima iti ospital ngem pimmusay metlaeng.
Impeksa met ni Della Dugmam Rodriguez, ina ti biktima, ti panagladingetna gaputa saanna a ninamnama a mismo a ti kabagyanna ti nangpapatay iti anakna.
