BAGUIO CITY–Im-imbestigaran paylaeng dagiti otoridad ti pakabigbigan ti suspek ken motibo daytoy iti panangpalpaltogna iti maysa a barangay treasurer ti Dolores, Abra idi malem kalman.
Nabigbig ti biktima a ni Bernie Micua, 37-anyos ken residente ti Mudiit, Dolores, Abra.
Maibasar iti report ti pulisya, paawid ti biktima ken ti dua a kadwana babaen iti motorsiklo manipud Bai, Lagayan idi pinalpaltogan daytoy ti suspek iti deppaar ti provincial road ti Barangay Silet sadiay San Juan, Abra.
Dagus a pimmusay ni Micua gapu kadagiti nasagrapna a tama ti bala ti paltog iti nagduduma a paset ti bagina.
Nasarakan met dagiti otoridad manipud iti nakapasamakan ti krimen ti siyam a basyo ti bala ti caliber 45 ken maysa a deformed slug.
Naamuan iti inisyal nga imbestigasyon dagiti pulis nga idi napasamak ti krimen ket nakabado ti suspek iti maris yellow, kalbo ken napudaw daytoy.
